Pisu bat dago nire betileetan,
ikusten uzten ez didana.
Pisu bat dago nire iraganean,
gelditzen uzten ez didana.
Ez ditut pisatu nahi,
baina pisatzen ditut
pisu diren hitzak, promesak, arauak,
haien pisukide diren
ohiturak, usteak, marmarak.
Pisu bat dago nire papilotetan,
entzuten uzten ez didana.
Pisu bat dago nire etorkizunean,
pausua galarazten didana.
Ez ditut pisatu nahi,
baina pisatzen ditut
pisu diren irriak, zirriak, laztanak,
haien pisukide diren
malkoak, listuak, azalak.
Pisu bat dago nire azazkaletan,
idazten uzten ez didana.
Pisu bat dago une honetan
pisatzerik ez dagoena.
Asel Luzarraga euskal idazle eta itzultzailearen web pertsonala